«Гэта можа быць фатальным». Таццяна Манёнак пра імавернае скасаванне паставак расійскай нафты
28.04.2021

«Гэта можа быць фатальным». Таццяна Манёнак пра імавернае скасаванне паставак расійскай нафты

Расійскія нафтавыя кампаніі могуць прыпыніць пастаўкі на «Нафтан» з-за санкцый ЗША. Абмежавальныя меры непасрэдна не закранулі расійскія кампаніі, але яны занепакоеныя тым, што іх могуць пакараць, калі працягнецца супрацоўніцтва з беларускімі прадпрыемствамі.

Пра гэта паведамляе Reuters.

Вашынгтон адклікаў дазволы на некаторыя здзелкі ЗША з дзевяццю падсанкцыйнымі беларускімі дзяржаўнымі прадпрыемствамі, уключаючы завод «Нафтан» і яго ўладальніка «Белнафтахім».

Што гэта азначае для Беларусі, тлумачыць аглядальніца «Белрынка» Таццяна Манёнак.

Яна кажа, што цяжка аналізаваць інсайдарскую інфармацыю без афіцыйных заяваў, хаця крыніца інфармацыі аўтарытэтная, дый адсутнасць абвяржэнняў з боку названых кампаній дазваляюць меркаваць, што такі сцэнар разглядаецца.

— Не вельмі верыцца, што такое ўвогуле магчыма, і Расія перастане пастаўляць нафту ў Беларусь праз амерыканскія санкцыі. Прынамсі ў час дзеяння гэтага пакета санкцый да яго прыпынення (санкцыі ЗША супраць «Белнафтахіма» і іншых прадпрыемстваў былі ўведзеная ў 2007 годзе — «НН») расіяне не баяліся пастаўляць, — кажа Манёнак. — Калі яны так занепакоіліся, то, імаверна, змянілася нешта ў механізме дзеянняў санкцый, у чым я не эксперт.

Але калі буйныя кампаніі сапраўды адмовяцца ад паставак на «Нафтан», то наступствы могуць быць фатальнымі.

«Нафтан» перапрацоўвае 9-10 мільёнаў тон нафты ў год, гэта палова нашай перапрацоўкі. Яго прадукцыя ідзе і на ўнутраны рынак, і на знешні рынак, на працу «Нафтана» завязаная работа «Паліміра» і «Магілёўхімвалакна».

Замясціць гэтыя аб'ёмы аб'ектыўна будзе вельмі цяжка: мы бачым з якімі цяжкасцямі адбываецца дыверсіфікацыя, невялікія партыі ідуць з Азербайджана, але калі забаяцца расіяне, то, імаверна, забаяцца пастаўляць і астатнія?

Я думаю, што ў такім разе павялічацца пастаўкі з Расіі ў Мазыр, які не пад амерыканскімі санкцыямі. Нашыя сціплыя ўласныя запасы нафты будуць перанакіраваныя з экспарта на ўнутраны рынак. Але асноўнае — будзе весціся пошук маленькіх нафтавых кампаній у Расіі са сціплымі абаротамі, якія за мяжу ў прынцыпе не пастаўляюць, таму могуць не баяцца заходніх санкцый.

Але яны змогуць паставіць аб'ёмы, дастатковыя хіба што для падтрымкі цыкла вытворчасці, бо спыняць завод вельмі дорага, трэба, каб ён хоць нешта перапрацоўваў.

Сітуацыя таксама моцна пагоршыцца, калі да амерыканскіх санкцый далучацца еўрапейцы.

Последнее в рубрике